كۆمه‌ڵنیووز
ماوه‌یه‌كه‌ بودجه‌ی حیزبه‌كان له‌كاتی خۆی دواكه‌وتووه‌و ئه‌ندامێكی سه‌ركردایه‌تی‌ كۆمه‌ڵی ئیسلامیش رایده‌گه‌ێنێت تاوه‌كو ئێستا حكومه‌ت هیچ هۆكارێكی رانه‌گه‌یاندووه‌ سه‌باره‌ت به‌دواكه‌وتنی بودجه‌ی حیزبه‌كان.
عه‌بدوالستار مه‌جید ئه‌مرۆ به‌كۆمه‌ڵنیووزی راگه‌یاند: بودجه‌ی ئێمه‌ش وه‌كو حیزبه‌كانی تر دواكه‌وتووه‌و هه‌رچه‌نده‌ حكومه‌ت هۆكاری دواكه‌وتنه‌كه‌ی رانه‌گه‌یاندووه‌ هه‌رچه‌نده‌ ئه‌وه‌یان وتووه‌ بودجه‌كه‌ ده‌ده‌ین .
ناوبراو وتیشی: به‌راستی جێگه‌ی داخه‌ حكومه‌تێك له‌وهه‌موو بودجه‌ زۆره‌ی له‌به‌رده‌ستیدایه‌، به‌ڵام نه‌توانێت بودجه‌ی ئه‌و حیزبانه‌ بدات له‌كاتی خۆی هه‌رچه‌نده‌ ئه‌مساڵ بری 90 ملیار دینار بۆ بودجه‌ی حیزبه‌كان دیاری كراوه‌، ناوبراو وتیشی: ئێمه‌ وه‌كو كۆمه‌ڵی ئیسلامی ئه‌وبودجه‌یه‌ی له‌حكومه‌ت وه‌ری ده‌گرین به‌خێری نازانین، به‌ڵكو مافی خۆمانه‌و خاوه‌نی كورسی و پێگه‌ی جه‌ماوه‌ری خۆمانین، هه‌روه‌ها ئه‌و بودجه‌یه‌ی وه‌ریشی ده‌گرین بری 350 ملیۆن دیناره‌وبه‌قده‌ر نه‌سریه‌ی مه‌ڵبه‌ندێك یان لقێكی ئه‌و دووحیزبه‌یه‌، ناوبراو راشیگه‌یاند: یه‌كێتی وپارتی ته‌نها به‌بردنی ئه‌و بودجه‌یه‌ نه‌وه‌ستاون به‌ڵكو له‌زۆربه‌ی لایه‌نه‌كانی حكومه‌ت سودمه‌ندن هه‌رله‌دامه‌زراندنی ئه‌ندامانی خۆیان و خانه‌شینكردنیان له‌سه‌ر حیسابی حكومه‌ت.
 عه‌بدوالستار مه‌جید راشیگه‌یاند: هیوادارم  حكومه‌ت و په‌رله‌مان به‌زووترین كات بتوانن یاسای بودجه‌ی حیزبه‌كان جێبه‌جێبكه‌ن و ئه‌و كات هه‌رحیزبه‌ی به‌پێی ئه‌و مه‌رجانه‌ی بۆی دیاریكراوه‌ بودجه‌ی خۆی وه‌ربگرێت.